India has never been a threat to Pakistan: Zardari

[LRE]

’صدر زرداری نے ایسے نہیں کہا تھا‘


ارمان صابر
بی بی سی اردو ڈاٹ کام، کراچی




’بھارت کے زیرِ انتظام کشمیر میں جو جدوجہد جاری ہے پاکستان اس کی سفارتی اور اخلاقی حمایت کرتا ہے اور کرتا رہے گا تاہم مسلح افراد جو کشمیری نہیں ہیں انہوں نے اس جدوجہد کو نقصان پہنچایا ہے‘۔

یہ بات حکمراں جماعت کے ترجمان فرحت اللہ بابر نے امریکی اخبار وال سٹریٹ جرنل میں صدر پاکستان آصف علی زرداری کا انٹرویو شائع ہونے کے بعد ایک وضاحت میں کہی ہے۔

انہوں نے کہا ہے کہ پاکستان بھارت سے تجارتی میدان میں خوفزدہ نہیں ہے۔

فرحت اللہ بابر نے صدر کے بیان کی وضاحت کرتے ہوئے کہا کہ صدر نے ایک مخصوص سوال کے جواب میں کہا تھا کہ پاکستان کو بھارت سے تجارتی میدان میں کوئی خطرہ نہیں ہے۔

انہوں نے کہا کہ انٹرویو کے دوران صدر سے سوال کیا گیا تھا کہ بھارت سے تجارت کے سلسلے میں کیا ان کو کوئی خطرہ محسوس ہورہا ہے تو جواب میں صدر نے کہا تھا کہ ہمیں اس سلسلے میں بھارت سے کوئی خطرہ نہیں ہے۔

ان کے بقول صدر سے سوال تجارت کے بارے میں تھا اور صدر نے وہی جواب دیا جو پاکستان پپلزپارٹی کا موقف ہے کہ پاکستان کو بھارت کے ساتھ تجارتی تعلقات رکھنے چاہیے کیونکہ اس سے دونوں ممالک کو فائدہ ہوگا۔

بھارت کے زیرِ انتظام کشمیر میں مسلح جدوجہد کے بارے میں فرحت اللہ بابر نے کہا کہ ’ہم سمجھتے ہیں کہ کشمیر میں دو طرح کے گروہ ہیں، ایک وہ جو مقامی ہیں اور اپنے حقوق کے لئے جدوجہد کررہے ہیں اور پاکستان ان کی سیاسی، اخلاقی اور سفارتی مدد کرتا رہا ہے اور رہے گا، اور ایک دوسرا گروہ بھی ہے جو کشمیر کے باہر سے آئے ہیں اور وہی لوگ مسلح انتہا پسند ہیں۔‘

ان کے بقول انہی’مسلح افراد نے مسئلہ کشمیر کو مزید پیچیدہ بنادیا ہے، اور کشمیر میں باہر سے جو بھی لوگ گئے ہیں وہ دہشت گرد ہیں، حریت پسند ہرگز نہیں ہیں اور انہیں روکنا چاہیے۔‘

امریکی جریدے وال سٹریٹ جرنل میں سنیچر کو شائع ہونے والے ایک انٹرویو کے مطابق صدر آصف علی زرداری نےکہا تھا کہ ہندوستان پاکستان کے لیے کبھی خطرہ نہیں رہا۔ اخبار کے مطابق انہوں نے یہ بھی کہا تھا کہ ان کی جمہوری حکومت بیرونی سطح پر ہندوستان کے بڑھتے ہوئے اثر سے خوفزدہ نہیں ہے۔

صدر نے یہ بھی کہا کہ ہندوستان کے زیرِانتظام کشمیر میں سرگرم مسلح افراد دہشت گرد ہیں۔

پیپلزپارٹی کی حلیف جماعت عوامی نیشنل پارٹی کے رہنماء میاں افتخار حسین نے صدر زرداری کے بیان پر تبصرہ کرنے سے انکار کرتے ہوئے کہا کہ ابھی ان کی جماعت اس بیان کا تفصیلی جائزہ لے رہی ہے۔

تاہم جماعتِ اسلامی نے صدر کے اس بیان کو آڑے ہاتھوں لیا ہے۔ جماعت اسلامی کے نائب امیر پروفیسر غفور احمد نے صدر کے بیان پر ان الفاظ میں ردعمل کا اظہار کیا۔

ان کا کہنا تھا ’پاکستان کے شہری بھارت کے ساتھ بہتر تعلقات قائم کرنے کے متمنی ہیں لیکن یہ کہنا کہ بھارت نے کبھی پاکستان کو نقصان نہیں پہنچایا یہ بیان بھارت کو خوش کرنے کے لئے ہوسکتا ہے کیونکہ بھارت نے اس بیان کا خیرمقدم کیا ہے تاہم یہ بیان حقائق کے منافی ہے۔‘

سیاسی جماعتوں کے اختلافی موقف اپنی جگہ لیکن سیاسی تجزیہ کار پروفیسر توصیف احمد نے صدر کے بیان کا خیر مقدم کیا ہے۔ انہوں نے کہا کہ صدر کا یہ بیان گذشتہ ساٹھ برس سے جاری اسٹبلشمنٹ کی پالیسی سے متصادم ضرور ہے تاہم خوش آئند ہے۔

پاکستان کے زیادہ تر اخبارات نے بھی پیر کو صدر آصف علی زرداری کے وال سٹریٹ جرنل میں شائع ہونے والے انٹرویو کو صفحۂ اول پر شائع کیا ہے اور چند اخبارات نے اپنے اداریوں میں صدر کے بیان کو نتقید کا نشانہ بھی بنایا ہے۔ روزنامہ نوائے وقت نے تو صدر کو مخاطب کرتے ہوئے اپنے اداریے کا عنوان ہی یہ دیا ہے کہ ’جناب زرداری! بھارت پاکستان کے لئے خطرہ تھا، ہے اور رہے گا‘


http://www.bbc.co.uk/urdu/pakistan/story/2008/10/081006_zardari_reaction_rza.shtml